POP 5

Lajmet më të lexuara të 5 minutave të fundit

Kronikë

Do dorëzohej më 12 korrik, ç’po ndodh me zemrën e Saimir Sulës! Ministria e Drejtësisë: Do të keni një përgjigje nesër! Motra dyshon se zemra e vëllait u mor për trafik

Ende nuk dihet se çfarë ka ndodhur me zemrën e shqiptarit Saimir Sula, që autoritetet spanjolle e gjetën 2 vite pasi i riu ndërroi jetë dhe trupi prehet në Shqipëri. Nga Barcelona, ku u gjet në morg, zemra do i dorëzohej zyrtarisht dje ministrisë sonë të drejtësisë, por deri më tani nuk ka asnjë njoftim

Zemra e shqiptarit Saimir Sula që ndërroi jetë në spitalain ‘Del Mar’ të Barcelonës gjatë kohës së pandemisë, do të dorëzohej më 12 korrik. Këtë informacion e dha zyrtarisht Ministria jonë e drejtësisë pas dakordësisë me autoritetet spanjolle, që me vendim gjykate vendosën dorëzimin e zemrës, por deri më sot nuk është dhënë asnjë njoftim zyrtar se çfarë ka ndodhur, pavarësisht insistimit të Report Tv.

Gazetarët biseduan me Majlindën, motrën e Saimir Sulës, që më 12 korrik, ishte vetë në Barcelonë, shoqëruar me 2 avokatë, për të parë nga afër këtë proces. Ajo tha gjatë bisedës me Report Tv se të mërkurën në Spanjë kanë qenë përfaqësues të ministrisë së Drejtësisë për kthimin e zemrës së vëllait të saj, por thotë se nuk e kanë lejuar të jetë pjesë e bisedimeve mes palëve, që sipas saj zgjatën për mbi 5 orë. Pa një përgjigje se çka ndodhur, Report Tv u interesua edhe pranë Ministrisë së Drejtësisë në Shqipëri, ku thuhet se për rastin do të dilet me një deklaratë zyrtare të premten.

Saimir Sula ka 3 vite nën dhe, ndërsa motra e tij që kur mbërriti trupi në Shqipëri konstatoi se i mungonte zemra, vijon betejën për drejtësi. Pas insistimit të saj autoritetet në Spanjë thanë se gjetën në morg zemrën e Saimir Sulës në tetor të vitit 2022, dhe këtu nisi beteja e radhës e Majlindës për ta sjellë në Shqipëri, ku kërkon që t’i bëhet edhe një analizë ADN-je, për të shuar çdo dyshim që zemra e vëllait të saj mund të jetë marrë për trafik organesh.

31-vjeçari Saimir Sula humbi jetën më 9 maj të vitit 2020 pasi shkoi me temperaturë në spital, për të kryer një test PCR, por nuk doli më prej atij spitali.

M.T/S.G/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sondazhi i ditës:

    5 vite nga krijimi i SPAK, jeni të kënaqur me punën e bërë?

Lajme të tjera



×

Lajmi i fundit