POP 5

Lajmet më të lexuara të 5 minutave të fundit

Ekonomi

Ulet me 102 mln euro borxhi i jashtëm bruto! Banka e Shqipërisë: Arriti në 8.8 mld euro në shtator

Në fund të muajit shtator borxhi i jashtëm bruto ka zbritur me 102 milionë euro. Referuar të dhënave të Bankës së Shqipërisë në fund të nëntëmujorit stoku i borxhit ishte 8.8 miliardë euro, nga 8.9 miliardë euro që ishte në qershor.

Pas një rritje të shpejtë të borxhit publik në periudhën e karantinës si pasojë e marrjes së shumë huave për të përballuar emergjencën, si dhe emetimit të eurobondit në muajin qershor në vlerën e 650 milionë eurove, Banka e Shqipërisë raporton për një rënie të lehtë të borxhit të jashtëm në fund të shtatorit.

Bazuar në statistika në tremujorin e tretë të vitit (korrik-shtator) stoku i borxhit të jashtëm bruto ishte 8.8 miliardë euro, nga 8.9 miliardë euro që u raportua në qershor, duke zbritur me 102 milionë euro.

Duke qenë se gjatë kësaj periudhe tremujore është marrë vetëm një kredi në vlerën e 80 milionë dollarëve, dhe nuk ka pasur huamarrje të huaj tjetër edhe stoku i borxhit ka pësuar një rënie të lehtë.

Por krahasuar me shtatorin e vitit 2019, borxhi i jashtëm është rritur me 508 milionë euro. Konkretisht sipas Bankës së Shqipërisë në fund të shtatorit të 2019 borxhi ishte 8.1 miliardë euro.

Fakti që vendi ka një nivel të lartë të borxhit në monedhë të huaj, e bën atë më të ekspozuar ndaj rreziqeve të ndryshme, ku kryesore është luhatja e kursit të këmbimit. Një luhatje e fortë e kursit mund të rriste kostot e kthimit të borxhit.  

Barra më e madhe e borxhit 4.3 miliardë euro është e qeverisë së përgjithshme, ndërsa 3.3 miliardë euro është hua e marrë nga vendet e huaja.

Tabela 1 Borxhi i jashtëm bruto

Shtator 2020        8,829 mln €

Qershor 2020      8,931 mln €

Diferenca             -102 mln €

Tabela 2 Borxhi i jashtëm 2019-2020

Shtator 2020        8,829 mln €

Shtator 2019        8,321 mln €

Diferenca              +508 mln €

Tabela 3  Ndarja e borxhit

Qeveria             4.3 mld €

Hua                   3.3 mld €

Afat-gjatë         4.3 mld €

E.M./b.ha./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sondazhi i ditës:

    5 vite nga krijimi i SPAK, jeni të kënaqur me punën e bërë?

Lajme të tjera



×

Lajmi i fundit