POP 5

Lajmet më të lexuara të 5 minutave të fundit

Sociale

Vlorë/ Fshati Mavrovë si në mesjetë, pa rrugë, ujë e dyqane, banorët: Zero investime, politikanët vijnë vetëm për zgjedhje

Pa burim të ardhurash, pa rrugë e pa ujë, banorët e fshatit Mavrovë në bashkinë e Selenicës në Vlorë, jetojnë në kushtet e mbijetesës. Shumica janë larguar, ndërsa në fshat nuk ka më fëmijë e të rinj. Banorët thonë se prej vitesh, fshati i tyre nuk ka parë asnjë investim.

Fshati Mavrovë, dikur numëronte më shumë se 150 familje, por sot kanë mbetur vetëm 50. I ndodhur 19 kilometra nga qyteti i Vlorës dhe jo më shumë se 5 km nga rruga e “Lumit të Vlorës”,  ky fshat është lënë në harresë.

Ata pak banorë që kanë mbetur, jetojnë në kushte mesjetare. Sikurse tregojnë vetë ata, janë pikërisht këto kushte që kanë çuar në ikjen masive të bashkëfshatarëve të tyre.

“Shkak i largimeve janë rruga dhe uji. S’kemi asgjë, as shkollë as dyqane. Rruga është për ibret. Këtu kanë qenë mbi 150 shtëpi, por tani s’kanë mbetur shumë”, thonë banorët.

Fëmijët, të cilët dikur e zhvillonin mësimin në fshatin Mavrovë, tani e bëjnë në fshatin Kotë, 7 kilometra nga ky fshat.

Dhe ajo që është më e trishtueshme, është plakja e popullsisë së kësaj zone. Një fshat, ku nuk ka asnjë fëmijë...

“Fëmijë këtu, 3-4 janë gjithsej dhe janë të lagjia matanë. këtu nuk ka asnjë fëmijë”, vijojnë ata.

Kjo ka bërë që shkolla e fshatit Mavrovë të mbyllet prej 10 vitesh.

“Ja shkolla këtu është, por ka 10 vjet që nuk funksionon. Në rregull është shkolla por nxënës s'ka. Kanë ikur në zona të tjera”, sqarojnë banorët.

Banorët e fshatit rrëfejnë se si prej vitesh, kjo zonë nuk ka parë asnjë investim, dhe se e vetmja periudhë kur politikanët duken, është ajo para zgjedhjeve.

“Kjo rrugë ka 2-3 vjet që ëhstë në këtë gjendje. Nuk vijnë as makinat, për ibret është rruga. Në këtë zonë ka 30 vjet që nuk është vënë dorë. Jetojmë si mos më keq, politikanët vijnë vetëm për votat këtu”, shprehen ata.

Banorët e fshatit Mavrovë, bëjnë thirrje për investime, si një nga mënyrat për të mos boshatisur fshatin. Ata shprehen se do të detyrohen të largohen edhe vetë, me mundësinë e parë që do t’u jepet...

SI.E./KT/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sondazhi i ditës:

    5 vite nga krijimi i SPAK, jeni të kënaqur me punën e bërë?

Lajme të tjera



×

Lajmi i fundit